الجمال والموضة

نصائح لكي سيدتي عند بداية سن الاربعين

بداية سن الجمال والنضوج والشباب

لو عديتى ال 30 و داخله على ال40 أو 50 هديكى شوية أفكار مش نصايح محتاجة تعمليها sticky notes فى كل حتة حواليكى.

• أول حاجة كده…أبو شكل اللى يزعلك😄…. ودى لازم تقوليها وانتى مقتنعة بيها وواخدة نفس عميق أيا كانت الاسباب لان كل حاجة نسبية وبتاخد وقتها🤷‍♀️

www.pxfuel.com

• متحاوليش تبررى موقفك او تصرفاتك لحد، سيبى الحرق الكتير ده لمحبى الترصد طمعا فى الظهور! وافتكرى ان عمرك وطاقتك امانة معاكى، واهدارهم على من لا يستحقون امر لا يستهان به، وفى نهاية كل مطاف “الكل يرى بعين طبعه”.

إياكى والانتقام

• إياكى والانتقام.. بيضيع وقت ويدمر لحظات ويقتل خلايا مخك وهرمونات سعادتك..الزمن بيدور وعدل الله نافذ لا محاله… يعنى لو نسيتى اللى حصل ف هوه متأيد فوق عند اللى خلقك، متحرقيش عالفاضى وخليكى ناصحة وعيشى برواقة..

www.pxfuel.com

• متبصيش وراكى ولا تقلقى من اللى جاى.. اقدارك مكتوبة.. والمكتوب لا بيروح ولا هايتسرق، واقصى ما يمكن فعله البشر تجاهك هو تنفيذ ارادة الله.. يعنى محدش سايقك! ف اطمنى.

• غيري طريقة اكلك، ونوع اكلك، ومواعيد اكلك لان معدل الحرق بيختلف كل فترة.

• اتحركى كتير … جيم، اتمشى، كدة يعنى هتفرق معاكى نفسيا جدااااا

• غيّرى إضائة اوضتك…هتفرق فى نفسيتك جداااا وعن ثقة.

• لو ليكي هواية سيبتيها ارجعى مارسيها حتى لو على الضيق it’s never too late 💙

اقرى… حتى لو ما بتحبيش القراية حاولى.

• اقرى … حتى لو ما بتحبيش القراية حاولى… الروايات الحلوة بتعيشى فيها حياة… لو مش حابة خالص يبقى شوفى الافلام الحلوة المُلهمة واتفرجى عليها❤

www.pxfuel.com

• الصاحب ساحب☝ …ابعدى عن الناس الساحبة للنكد والنفسنة والنميمة والشكوى وحرق الدم …حاوطى نفسك بناس لطيفة ووشوش جديدة بتحب الحياة وبتعرف تقول الحمد لله من غير نواح وتهويل وإسقاط ع الغير.

• متركزيش مع البوستات الكوميدية المغلفة بالنصايح الوهمية.. لان الاغلب دلوقتى بيعملوا حكماء دمهم خفيف والحقيقة انهم معقدين كارهين للحياة ف بيصدروا طاقة سلبية كئيبة مرجعيتها تجارب اسوأ وبيبقوا زى المرض..يصيب العدوى بمجرد الانتهاء من الضحك.

• ابعدى عن اللي كل دورهم ف حياتك الانتقاد والنصيحة بنية «اصلنا خايفين عليكى، وعارفين مصلحتك»
البوست دة اصلا عشان عديتى ال 30 يعنى عيشتى وقابلتى فى الدنيا ما يكفى اللى يخليكى تعرفى مصلحتك واللى يريحك … ماتغيريش نفسك عشان ترضى حد.

• واخيرا ولانه الاهم حبيت اختم بيه… قربى من ربنا بأى صورة وثبتيها مهما حصل عشان دى اللى دايما هترجعك له تانى.. وتأملى النعم اللى انعم عليكى بيها عشان متحسيش بالمفقود، وألجأيله فى كل مشاكلك وبلاش تحكى مع الناس!! الناس بترضى فضول وتكشف اسرار وتعاير بضعف ومش ف ايديهم حلول!! ، افتكرى بس اسماء الله عز وجل هاتفهمى اكتر..
اسمه السميع..الودود..العادل..الجبار..المنتقم.
يعنى سامعك بدون شرح و بكل وِد وعادل فى كل امورك وهايجبر خاطرك وهايجيبلك حقك…
ف متجريش ابداااااااااا على حد غيره✋

www.pxfuel.com

• اوعى تستهونى بمفعول الصلوات ال ٥ فى يومك!!! عشان اقسملك بالله عدمهم بس كفيل يجيبلك اكتئاب مزمن مهما كنتى سليمة ومبسوطة وبتعملى كلللل اللى فوق ده ولا هايأثر…ومهما كنتى مقصرة متتكسفيش تصلى!..هية هتنهيكى عن اى حاجة غلط اسمعى منى وسيبى دايما باب موارب.. عشان تقدرى حتى تدعى ربنا وانتى واصلاه مش قاطعة صلتك بيه…..✋

ووصيتى بقى ليكى

• ووصيتى بقى ليكى انك ماتخليش الدنيا والناس تقتل البنت الصغيرة الحلوة اللى جواكى وتحولها لقرشانة وحيزبونة… البنت دى حياتها مهمة جدا جدا لحياتك💙

www.pxfuel.com

free photos : www.pxfuel.com

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق